• drkkleung

記憶可靠嗎?

對我哋有切身關係,又或者影響到我哋心情無論好壞嘅經歷,我哋都特別記得,上次分手對方刺得自己最痛嘅說話同眼神一定歷歷在目過你上個星期同班同事食晏嘅情形。


要回想起剛剛發生嘅事,我哋通常都可以諗起好多細節,例如尋日你同中學同學阿輝Helen肥波同NC喺逸西軒生日晚飯食過漿住嘴嘅膏蟹豆苗果皮紅荳沙仲有一份你恨咗好耐嘅生日禮物PS5仲有個靚仔侍應介紹菜色時眼金金咁望住NC⋯⋯過咗一年後,你記得嘅細節會少啲,可能仲記得有邊幾個同學喺邊度食漿住口嘅蟹同埋你仲玩緊嘅PS5係佢哋送嘅; 五年後,你記得嘅仲少啲,你可能會記得Helen同阿輝去食蟹仲有個遊戲機;十年後,你可能只係記得有中學同學同你食生日飯仲送咗個遊戲機。換句話說,隨住時間流逝,我哋個腦只會保留經歷嘅主線,同埋一啲對我哋影響深遠、有特別意思或者帶住某一種強烈情緒嘅細節。所以,如果你不幸遇到車禍被困喺反轉嘅小巴裡面好無助好痛好驚咁等緊有冇人嚟救援,你可能會好記得張凳㸃樣壓住你、周圍啲血、其他人嘅驚叫聲同埋時間好耐都見唔到有救援員⋯⋯呢啲畫面好深刻,有時仲會自然浮現喺腦海裡面。


個腦會只保留經歷嘅主線或主題,主要可能因為個腦始終資源有限,一生人發生咁多事冇可能好似錄影咁將所有細節都巨細無遺記錄落嚟,況且我哋注意力放喺某啲嘢度自然未必留意到其他嘢;但一啲帶有強烈情緒嘅細節會深深印喺你腦裡面歷久不衰,科學家相信呢個可能係一種保護自我生存嘅機制,記住一啲害怕嘅細節讓我哋將來可以喺未發生事時已經察覺到危險,記住一啲傷心嘅塲面讓你知你需要找尋安慰保護,記住開心興奮嘅畫面讓你向住呢個方向尋找快樂⋯⋯因為情緒嘅其中一個作用係推動你如何生活下去。


另一方面,科學家發現『錯誤記憶』嘅現象,係指我哋可以喺別人引渡下不自知咁以為記住咗一啲其實冇發生過嘅嘢。最極端嘅例子係某啲人喺催眠師暗示下錯誤以為發掘出兒時被侵犯嘅記憶,其後事實証明並無發生,所以某啲地方嘅法庭係唔會接受喺催眠下得出嘅資料作為可信證據。


後來更多研究發現,以為記咗一啲嘢但啲嘢其實冇發生過原來都可以喺日常生活中出現。我哋經歷咗一件事之後,我哋會保留主線同某啲細節,每次當我哋回想起件事嘅時候,就好似讀書温習咁,將個經歷嘅資料重温一次,咁記憶就加強咗深刻咗;但係喺有啲嘢記得好深刻同時又有啲嘢遺忘咗嘅情況下,個腦會以記憶嘅形式為遺忘咗嘅細節填補我哋認為係理所當然嘅資料,例如兩年後Helen同你講起當日𥄫住NC個靚仔有冇戴眼鏡,你會覺得你記得佢有,因為你記得NC面都紅曬,而眼鏡男一向都係NC嘅口味,但Helen之後攞返啲相睇至知佢其實冇帶眼鏡。呢啲偏差嘅記憶通常都同個記憶主線同已經記得好深刻嘅細節有關,好少偏離原本嘅記憶藍本。


記憶既可靠又唔可靠,睇你係指啲乜。不快同沉重回憶嘅主線同帶有強烈情緒嘅細節因為本身好震撼加上經常回想或自動浮現重覆重温而變得更牢固更沉重;另一方面,記憶中嘅另一啲原本模糊甚至已經遺忘嘅細節又會因為唔同嘅原因變成偏差回憶。科學研究其實仲未揾出呢種偏差如何運作,只知道件事係好定壞,當事人本身嘅情緒狀態,同埋當事人用咩方法回想個經歷,都可以唔同程度咁影響到回憶嘅準確度。


今集講得比較長一啲,腦神經心理認知機制好複雜,科學家仲有好多問題未清楚未解答到,絕非三言兩語能夠講清楚。至於帶住不快同沉重嘅回憶點先可以走出嚟,希望將來有機會再講。






45 views0 comments

Recent Posts

See All

絕境中守破離

好境不常。絕症、牢獄、戰亂、屠殺、天災人禍、家散人亡、死人冧樓⋯⋯連環不幸事件,世界好多角落都發生緊。 心理治療入門都一定讀過 Viktor Frankl (1959, 2000) 嘅 Man's Search For Meaning,記述佢被困納粹集中營期間,點樣為自己嘅生命、死亡、信念同受苦找尋意義嚟捱過呢段隨時送命嘅艱苦日子。Panter-Brick 同 Eggerman (2011) 喺阿

細節