• drkkleung

打者愛也?

Will Smith 喺頒獎禮 打 Chris Rock,大家嘅反應除咗估佢哋係咪做戲提高收視之外,就係覺得 Will Smith 為咗維護老婆好 man,又或者點講打人都係唔啱,然後就重提 Will Smith 嘅自傳講佢原來細細個就目擊家庭暴力。


的確,無數嘅研究已經確立家庭暴力係會傳染俾下一代。縱使當時有幾十米嘅距離,而且有時間俾佢揀點反應,我相信 Will Smith 當時喺腦海裡最活躍嘅選擇就係打人,因為佢細個耳濡目染學得最多嘅就係呢個方法嚟表達情緒同解決問題,就算大個之後理性上知道仲有好多其他方法,但當時嘅情緒所牽動潛伏喺記憶中最突出嘅就係打人呢個『劇本』同選擇。


唔通人就咁被孩提經歷困住改變唔到自己?答案係:可以改變,但要用力,仲要好大嘅決心。


好多時,惡、鬧人、大發脾氣、兇人甚至打人,對某啲人喺某啲情況嚟講係可以快狠準咁解決到一啲問題達到一啲目的,換句話說,惡,對一啲人嚟講可以從中得到好處嘅; 所以要一個發慣脾氣從暴躁而得益嘅人改變,佢係要清楚知道自己點解要變。我遇得最多嘅原因係,唔想影響健康,特別患咗冠心病之後;另外就係唔想仔女好似佢自己咁,並且想改善同仔女嘅關係。


有咗改變嘅意義同決心,就可以訓練自己。記錄同認識刺激到自己動怒嘅人同事,然後喺腦中重複排演喺呢啲情況下新嘅應對方法同想法,目的就係要改寫潛伏喺記憶嘅劇本。記錄同察覺動氣時嘅身體反應,然後學習及時降温同放鬆嘅方法,唔好等火山爆發咗先嚟救火。更難嘅就係走進內心世界,了解嗰啲人嗰啲事點樣刺痛自己嘅『死穴』,係認為別人唔尊重自己?係要等要忍受未得到嘅嘢唔實在感覺好焦慮?係跳掣認為唔公平唔正義?係想起以往老豆打阿媽時嘅忿怒同無助?揾出呢啲好容易被引爆嘅內心火藥,學習拆彈。


有時,暴燥會跟其他情緒問題糾纏喺一齊,抑鬱呀焦慮呀性格障礙呀咁,就要更多嘅耐性更多嘅決心,可能要揾專業人士幫手添。


不過,最重要嘅係,只有你係自己嘅拆彈專家。









19 views0 comments

Recent Posts

See All