帶住耐性。
耐性係一種性格特質，亦係一種狀態，我哋會形容一個人好有耐性（性格），亦會話「啲人好有耐性咁排隊入投票站」（即係話就算一個「冇耐性」嘅人有時都會耐心咁等）。
有關點樣培養或訓練耐性嘅研究寥寥可數。心理學家發現一個人當下嘅耐性似乎同佢預咗要等幾耐有關，如果佢預咗要等三個鐘至買到份報紙，咁等三個鐘都唔覺得耐（平時去7仔買報紙個收銀員嘟得慢啲可能已經忟）。而且等嘅時候，如果有啲嘢令佢好投入同集中精神，咁啲時間又好似快過啲，變得好似多咗啲耐性咁。不過，如果等嘅時間長過佢嘅預期，或者佢經常check 住等咗幾耐，又或者等嘅時候有好多挫敗同唔順利嘅感覺（譬如有人打尖），咁就好容易變得唔耐煩。又不過，雖然失去咗耐性，但係有啲人可以改變自己嘅想法攞返啲耐性，例如為對方設想一下有咩困難點解仲未得，為人著想一吓⋯⋯
咁即係話，平時可以點樣訓練耐性呢？試吓練習專注覺察當下嘅經驗 (mindfulness)令自己投入當下啲呢一刻，亦可以練習點樣為人多設想，可能有啲幫助。
香港人出咗名冇耐性，特別係冇得預計疫情幾時會完，加上經濟壓力家人磨擦⋯⋯
；其實香港人已經好有耐性。堅持下去。
參考：Schnitker, S. A. (2012) An examination of patience and well-being. The Journal of Positive Psychology, 7(4), 263-280.