寫完上次「耐性」篇文，立即感覺好離地。因為我唔係一個有耐性嘅人。
一個人表現一啲所謂冇耐性行為，譬如駁阿媽嘴，郁吓就發脾氣，或者講咗啲嘢要即刻做，可以有好多原因，唔一定係冇耐性咁簡單。最常見嘅就係焦慮緊張，啲嘢未發生就覺得唔穩陣，甚至擔心出岔子，個心囉囉攣好唔舒服，於是要即刻做或立即見到個結果至安心。另一個常見嘅情況就係一向有好多挫敗唔順利嘅感覺（frustration)積累，覺得人哋有意無意阻住自己，或認為自己已經好不幸或已經遇到好多唔公平嘅事，眼前小小嘅沙石都牽動到呢種累積嘅情緒。有啲人因為有啲抑鬱，灰灰憤恨易忟𢛵。有啲人完美主義，每樣嘢都要快靚正，連自己都要一樣快。
況且，好多需要耐性嘅嘢，往往係冇得預計幾時會發生，亦未必有人物對象，例如瘟疫幾時完，瘟神幾時走⋯⋯所以只係學習改變預計等候時間嘅經驗同埋同理心（唔知我講咩就請睇番上一篇）都未必可以解決到冇耐性嘅問題。但有啲人仍然好有耐性咁喺黑暗中堅持落去，因為佢哋有人心存豁達，有人克苦耐勞，有人活在當下，有人避開唔諗，有人埋首於更有意義嘅事情中，有人放開憂慮，有人控制表達心急嘅方式，有人釋放心中鬰結⋯⋯
你冇耐性因為乜？點樣對症下藥？邊種方法至啱你？有時可能需要一個唔離地嘅心理學家同你一齊揾答案（賣吓廣告都得啩？）。