腦神經科學另一個發現就係你如果唔經常做某一樣嘢，咁原本支持呢樣嘢或功能嘅腦神經細胞就會漸漸失去反應，use it or lose it，唔用就冇咗（冇咗係啲反應唔係細胞）。相反，你經常做嘅嘢，仲可能會霸埋呢啲腦細胞嚟加強效能添。
所以，如果你啱啱學咗日文，之後唔經常講就變生疏，因為日文嘅腦細胞相互連結會脫勾、突觸會萎縮；至於你每日都講嘅廣東話加埋不斷學新嘅俚語「像極了愛情」呀「幫緊你幫緊你」呀，咁自然會要更多嘅腦細胞支援啦。如果你好中意同時做幾樣嘢，睇 ig 睇電視食零食講電話查指甲油，你慢慢發覺要集中有耐性睇一本書甚至咩都唔做會越嚟越困難，因為長期集中力同耐性嘅腦神胞好耐冇運作過，甚至可能已經支援咗要一眼關七跳嚟跳去嘅功能度。
你有幾耐冇踩單車講英文睇書俾耐性控制脾氣瞓覺時放鬆自己遇到壓力時活在當下⋯⋯？
你係咪經常重覆壞習慣令有關嘅腦神胞越嚟越活躍，而同時讓好習慣嘅腦細胞萎縮流失？