前排我其中一個龜蜜喺通訊群組些牙咗一篇某行家嘅專欄大作，話引起佢公司其他行家火熱地討論，叫我哋都睇睇，點知竟引爆咗我同呢位龜蜜『好耐（好少）有咁樣交流』嘅交流，於是我決定喺呢度記低我嘅想法，等我老到冇曬記性時都可以睇番。
當事人喺心理治療中停滯不前，喺過程中唔肯開放坦誠，又或唔願意按會面時訂定嘅計劃喺生活中改變，有啲治療師會認為係當事人自身嘅問題，叫呢種現象為阻力（client resistance）。呢個將當事人原地踏步歸咎於當事人嘅想法喺心理治療嘅發展中由來已久，自Freud已經開始，唔同學派只不過理由唔同。當時初出茅廬，加上self-fulfilling prophecy嘅心理機制影響下，心理治療冇進展就好容易用呢個阻力概念嚟解釋，雖然好似可以釋懷一下（因為唔係我有問題）但亦同時感到無助，以為讀書嘅嘢都應用唔到嘅； 直到 Steve de Shazer 喺1984年發表咗一篇名為 The death of Resistance 嘅論文（其實我嗰時應該仲係著住尿片，只係我讀書時先生冇教，我又冇睇過），認為所謂嘅 resistance 其實係治療師同當事人互動時產生出嚟嘅，當事人對你表達佢將討論過嘅技巧拋諸腦後，或攞番支煙嚟食，或胃痛都隨便食乾糧嚟頂肚，都係視乎治療師點引導佢，點問問題，甚至係治療師自己對當事人嘅假設、態度同理解有關。我記得當年睇完呢篇文之後成個醒曬，因為停滯不前嘅唔係當事人，係作為治療師嘅我！當然，呢篇文之後，心理治療界除了 de Shazer 嘅 Solution-Focused Therapy 之外，不同嘅學派都慢慢發展出不同嘅技巧嚟處理停滯不前嘅問題，甚至好似 Motivational Interviewing 咁自成一派，令一眾從業員獲益不淺。
心理學界以科學為本，對各種問題隨住知識嘅發展進化，以往有好多人以為啱嘅嘢，今日知道唔啱，而小弟作為一個心理從業員，喺專業上都曾經歷呢個過程，而且仲不斷經歷緊。我而家每次見人都反問自己做成點，其實每次都揾到啲 blind spots，每次都覺得可以做得更好，甚至有時覺得睇唔到自己嘅限制——當然呢個都可能係我完美主義嘅一種顯現；但我明白到發現同轉化係需要時間需要機會甚至需要其他人嘅指點，助人專業人員嘅知識、技巧同心法都需要時間成長同轉化，係一個漫長嘅過程，所以我對年輕嘅行家大都保持一點慈悲，比較坦然接受佢哋唔知唔覺行咗入堀頭巷；雖然好多嚟過我度實習嘅學生都覺得我好 harsh咁直斥其非，我相信好多俾我比肥過又或者喺我手上攞唔到A嘅學生係好憎我嘅，但我相信有好多學生都會好珍惜跟我學習嘅時間，因為我會睇佢哋實地點做嘢，我又會俾佢哋睇我點見病人點做心理評估同治療，過程中希望大家培養出開放自省同聆聽意見嘅胸襟，咁至可以不斷進步同進化。
無諭係初入行，定係做咗十年八年，定係已經係老油條，抑或係上咗神枱嘅大師級前輩，能夠保持呢種自省更新嘅能力，喺呢條助人卻又助己嘅專業歷程上繼續演化。
