大概，每個人每日至少照一次鏡；但總會聽過有人對伴侣講：『啲鼻毛咁長都唔剪？你今朝照鏡睇唔到㗎咩？』可能你都係其中之一。
望住自己，我哋通常只睇到我哋想睇到嘅嘢，或者在意嘅地方。最極端嘅，譬如患有抑鬱症嘅人，只會見到自己差劣失敗； 又或者，好似啲患有自戀性格障礙症嘅人，淨係睇見自己比別人優勝。
又或者，企喺鏡前，我哋根本冇認真睇清楚自己。
喺心理治療嘅過程中，治療師嘅其中一個角色，就係幫你學識照鏡。
照鏡，唔係批評檢討得失過錯，而係了解自己嘅情緒、想法、習慣同環境之間嘅互動模式，問題嘅起源，同埋有咩因素令你停留喺問題嘅惡性循環裡面。
最簡單嘅，就係每日記錄低事件嘅經過，揾出自己點樣一步步咁踩落個氹度。一位患有焦慮症同暴食症嘅女士，佢發現晚餐後就諗起週末遊船河要著泳衣，朝早起身感到身體脹脹，於是磅重發覺重咗半磅，猛咁照鏡揾吓肥咗喺邊，心情越發鬱悶，然後同同事食完晏後一個人行街散心經過一間蛋糕店，諗住橫掂都肥咗，一於食番個朱古力厚切蛋糕，跟住一發不可收拾，買多幾樣做下午茶，然後晚餐因為後悔，一啲嘢都唔食，成晚喊。另外有一位患有抑鬱同焦慮症而脾氣暴躁嘅父親，經常俾一對患有 ADHD 嘅仔女激到出口出手，佢嘅記錄發現最經常出現打鬧嘅情況就係當佢一方面要處理工作，另一方面仔女要佢應佢哋，佢就無明火起，一股熱氣湧上心口，就破口大罵，仔女自然還擊，佢覺得佢哋又失控，於是出手想打到佢哋收聲，當然越打越喊，終於自己行開。循環不息，永無止境。
記錄，照鏡，發覺自己嘅習慣/習性/模式，同事件嘅輪流轉。然後決定要唔要打破突破。
另一種更深入嘅照鏡，係記錄你處身於情緒巔峰嘅時候嘅狀態，當你發緊老脾，驚到震，鬱到喊，忍唔住想摸。。。你當時嘅感受、身體反應、想法係咩？當時你遇到嘅事，見到嘅聽到嘅，對方點對你嘅，呢啲發生喺外面嘅嘢對你嚟講有咩意思？你感受背後係咩嘅需要？觸動咗你內心嘅咩？觸踫咗你嘅咩死穴？㩒咗你邊個掣令你故態復萌？一位患有勃起障礙嘅青年，佢約會時就已經有一種『要做個好男人』嘅想法，認為男人應該要令對方有安全感，當佢同伴侶做愛時，更想起前度捨棄佢另覓新歡，覺得係因為自己滿足唔到對方，憂慮擔憂令佢冇辦法投入享受性愛，無法勃起。另一位對太太發怒而又自責嘅丈夫，發現自己因為自細不滿以前爸爸打駡酗酒嘅媽媽經常離家而去，深藏一種對太太嘅責任感，但又恐懼自己表達不滿會好似佢爸爸咁無助逃避，所以落入發怒自責埋怨嘅循環中。
情緒，想法，身體，構成隠藏喺內心三位一體嘅習慣/習性/模式。呢啲模式經年累月咁影響我哋，特別係當我哋面對困難壓力同挑戰嘅時候，佢哋就會活躍起嚟控制我哋。
呢種照鏡，最好喺情緒巔𡶶時做，因為當時所有有關嘅想法感受同身體反應都係最活躍，最能夠幫你了解自己內心到底發生咩事，甚至你可以追朔返自己點樣從小就養成呢種習性/模式。唔一定係受過咩創傷，可能只係我哋成長中某啲需要得唔到適當嘅回應或滿足而已，我哋每個人都係成長經歷嘅果子。
另一個做法，就係治療師喺會面中引導你詳細回顧事件嘅經過，讓你盡量投入當時嘅狀態，等你可以重新經歷情緒背後嘅真我。所以，心理治療嘅過程唔係做 spa，或者見完嗰節會成個人即刻開心曬。
照鏡，睇清自己。改變或接納自己。
有啲人從來唔照鏡，唔面對自己，經常將問題歸咎其他人或命運。咁治療只可以幫佢討論有咩解決問題嘅方案。呢個嚴格嚟講，唔算係心理治療。佢可能更需要嘅係有錢老闆、律師、電台節目主持人，或者係占卜問米師。
