2022伊始，學吓啲頒獎禮咁回顧一吓去年下半年喺大學教咗成個學期嘅 Biological Psychology 嘅心路歷程。
做咗¼ 個世紀嘅臨床心理學家，一向都好中意教學生，教學雙長。以前喺醫院點忙都抽啲時間督導實習嘅臨床心理學家，間中去大學講一兩堂書；私人執業後，反而有機會教整個學期嘅，仲要有幸地教我最怕嘅呢一科基礎科目。
Biological Psychology 係心理學嘅必修科目，年少無知，一路都唔知點解要讀呢科，讀埋嗰啲咩 neurons 呀，action potential 呀，long term potentiation 呀。。。都唔知做乜，同心理學有咩關係呀？！講真，我真係唔記得讀咗啲咩。用心理學去幫人應該好浪漫，於是就一知半解咁斷定一個人唔應該約化為物理同化學反應，咩先天定後天都唔重要，人係獨特嘅！就咁，我放低咗呢一科，當佢冇到。
然後，其實唔係好耐嘅然後，我嘅工作就要為中風同腦科病人做腦神經心理評估同康復服務。當時最震撼我嘅係，原來人腦嘅運作係可以直接改變你接收呢個世界訊息同表達你自己想法嘅能力，甚至可以令你冇咗半個世界或半邊身都唔覺，個性同情感變成另一個人都不自知，生活喺只有十五分鐘嘅世界裡面都冇所謂。受想行識的而且確受腦袋裡面嘅物理世界影響。再然後，我讀博士就選擇咗腦神經心理學再鑽研落去，後話。
應承教呢科初期有啲遲疑，因為我一路覺得自己有好多腦神經心理學嘅臨床經驗，所以我應該將呢啲經驗分享俾受臨床訓練嘅人，教實戰而唔係教基礎知識。然而回心一諗，教呢一科恰恰俾我一個機會回顧基礎科學嘅知識，備課時發覺呢十幾年科學發展得好快，對好多心理現象有不少突破性嘅發現。以前我臨床實習嘅其中一位對我影響深遠嘅導師陳乾完博士曾經提過佢會時不時睇番啲基礎心理學嘅課本update 吓，因為臨床心理學家唔係讀幾套咩 CDE XYZ 療法就照搬喺人身上，治療係要建基於對心理現象嘅基礎科學理解，實證咁去進行。好感恩呢個種子一直喺我心裡面，令我好享受呢幾個月艱苦但又過癮嘅備課。教呢科，第一個有得著嘅係我自己。
於是，我喺第一堂跟同學分享咗我由 I hated Biological Psychology 變成今日 I teach Biological Psychology 嘅心路歷程，想佢哋知道我都曾經滄海，你唔中意呢科唔緊要，我明嘅。又於是，我盡量將啲 presentation topics 變得同我哋日常生活有關，例如：啲細路個腦嘅發展係咪可以催谷？發夢喺個腦嚟講係一回咩事係咪有得解？調節體重嘅機制係點同減肥最好係用咩方法？性向同性別認同係點形成，到底所謂先天同後天即係乜？個腦到底一心多用好定專注覺察好？係咪可以有理性冇感性？亦因為咁，其實啲題目變得好難好深。
喺第一堂我仲同啲同學講咗我讀碩士時候我其中一位教授第一堂對我哋講嘅說話，當時教授同我哋講大意係『你哋會係專業人士，所以你哋由今日起就要表現專業人士嘅風範同行為』；於是我都同我啲學生講：你哋讀緊碩士，所以我會以碩士生咁看待你哋，要獨立思考，唔好叫我俾 marking scheme。。。。（下删囉嗦千字文）
『年輕怎麼就是錯？』相反，啲同學一啲都冇令我失望！我雖然唔知佢哋知唔知我想講乜，但係見到佢哋好努力咁哽咗好多我冇諗過佢哋會有興趣嘅資料，presentations 個個都五光十色，啲 essays 一啲都唔差，勁！我盡量迫佢哋將個範圍集中喺日常心理現象上面，但都有同學雖然想寫一啲同變態心理學有關嘅嘢，我就同佢哋講，其實當你哋有機會接受臨床訓練之後，你就會覺得以前唔夠時間同機會去了解一啲基礎嘢，信我，過來人。最開心嘅係，有同學學期尾表示佢對呢科同心理學改觀咗（希望係好嘅嗰方面）。
至於我自己，我覺得教到甩皮甩骨，好慚愧。太多資料想講，好多時失重點。講得太快，帶唔到一啲值得思考嘅題目，例如明年一定要講番因為神經物質傳遞訊息需要時間所以我哋接收嘅外界訊息係咪真係 realtime ； 自我存在嘅一致性係咪需要大腦綜合運作定係簡單腦神經活動就可以。。。。（我又自我陶醉了）講返甩皮甩骨，當然就係全英文講三個鐘經常講唔到如咒語般嘅化學同生物學嘅名詞； 第一堂講完個喉嚨痛咗三日；仲有見到上一堂個 Miss 年輕貌美又識著靚衫而我就又老又殘又冇肌肉，全程錄影全球轉播點見人？。。。唉😮💨 而家教書真係吖。
好多謝我嘅 teaching assistant Jenny 佢幫咗我好多好多，佢同啲同學關係好到啲同學希望其他科佢都可以繼續做 tutor ! 多謝李教授推薦，多謝心理學系 admin 嘅 Janice同 Judy。作為一個教書佬，喺廿秒鐘之內應該可以講曬要多謝嘅人。
P.S. 其實寫呢啲嘢係唔會招倈生意； 但我又冇樣冇身材又唔識唱歌搞笑搞氣氛，更加唔識拍片開 live，又唔識整一啲目不暇給嘅心理教育網上材料；我只係一個活喺自己世界嘅癈佬嘗試學人講吓：香港嘅心理學界加油，年輕嘅心理學家加油！係咁先啦，下次再講啦。